Magahiwat ang Archdiocese of Jaro sang misa alas kuwatro buwas sang hapon, Abril 26, nga kadungan sa Funeral Mass sa Saint Peter’s Basilica sa Vatican para kay Pope Francis.
Sa pastoral announcement ni Jaro Archbishop Most Reverend Midyphil Billones, D.D., iya ginpahayag nga patigayunon ang misa sa Jaro Metropolitan Cathedral para sa “eternal repose” sang Santo Papa.
Gina-request ang clergy, religious, kag lay faithful ilabi na sa syudad nga mag-upod sa Holy Mass samtang ginahaylo naman ang mga parokya sa idalom sang archdiocese nga magpatigayon man sang misa para nga makapangamuyo sang tingob para sa “spiritual solidarity.”
“For those who may not be able to join this due to previously accepted schedules, kindly do it at the soonest pastorally suitable time. In line with this, the Commission on Liturgy is tasked to facilitate the liturgical celebration and guidelines,” suno sa Archdiocese.
“In this period of mourning, let us unite in faith and love as we commend our beloved Pope Francis to the mercy of the Risen Lord,” dugang pa sa pastoral announcement.
Magluwas diri, may prayer vigils man nga ginahimo diri sa Iloilo lakip na ang iya sang Sta. Ana Parish of Molo nga magalawig tubtub karon sa gab-i.
Suno kay Msgr. Jose Marie Amado Delgado, Parish Team Ministry Moderator, nag-umpisa ini sang Lunes sang gab-i kun sa diin antes ang vigil, ang lectors kag ang commentators ministry ang nagapanguna sa pagpangamuyo sa Holy Rosary nga isa ka petisyon para sa intentions ni Pope Francis.
Mahimo man makakadto ang mga tumuluo nga Katoliko sa Parokya agud nga magdala sang bulak ukon magpangamuyo gamit ang Prayer Guide nga ginhanda naman sang Worship Ministry.
(Photo: Guide to the Philippines)
