Nagakahangawa ang Archdiocese of Jaro sa mga magakontra sa ila ginaduso nga anti-political dynasty law paagi sa “Dapat Isa Lang” Movement People’s Initiative para sa pagpasar sang genuine Anti-Political Dynasty Law sa Pilipinas.
Sa interview sang Bombo Radyo kay Msgr. Meliton Oso, director sang Jaro Archdiocesan Social Action Center (JASAC), iya ginpahayag nga indi gid malikawan nga may mag-oppose sa ila ginaduso nga inisyatibo.
Suno kay Msgr. Oso, amo ini ang rason kun ngaa kinahanglan nila nga mapabaskog ang ila kampanya kag makakuha sang kinahanglanon nga mga pirma antes mag-abot ang tuig 2027.
Handom sang grupo nga makuha ang 10% sang kabilugan nga rehistrado nga mga botante sa pungsod antes Disyembre 31, 2026.
Dugang pa ni Oso, may indi maayo nga epekto ang political dynasty, gani importante ang bulig sang media sa pagpalapnag sang impormasyon kag pagpaathag sa publiko nahanungod sa ila ginaduso nga anti-political dynasty law.
Suno kay Msgr. Oso, nagatinguha ang inisyatibo nga mahatagan sang mas madamo nga oportunidad ang iban nga mga pumuluyo nga makaserbisyo sa gobyerno.
Target sang grupo nga mangin isa na ini ka layi antes ang 2028 elections, agud, suno kay Msgr. Oso, mahimo na nga mapunggan ang pagpadayon sang political dynasties sa amo nga eleksyon.
