Nagpahanumdom ang Archdiocese of Jaro sa publiko nga likawan gid ang paghimo sang ‘ambush badlis’ sa Ash Wednesday.
Ang ambush badlis amo ang pamatasan sang isa ka tawo nga magpadulong lang sa simbahan agud magpabadlis, apang indi magtambong sa aktwal nga misa sa tion sang Miyerkules sang Badlis.
Sa interview sang Bombo Radyo kay Rev. Fr. Angelo Colada, Director sang Jaro Archdiocesan Commission on Social Communication, iya ginpahayag nga magapatigayon ang simbahan sang paraliturgical services sa nagkalain-lain nga establisyimento sa siyudad para sa Ash Wednesday.
Paathag ni Colada nga paagi sini, maakomodar ang mga tawo nga indi makapadulong sa simbahan sa tion sang misa.
Suportado man ni Colada ang panawagan sang Catholic Bishops’ Conference of the Philippines (CBCP) sa mga tumuluo nga magpuasa indi lamang sa pagkaon kundi pati sa paggamit sang cellphone kag social media.
Paathag niya nga paagi sini, may kahigayunan ang kada isa nga maghatag sang tion sa pagpangamuyo kag pagkilala sa Diyos.
