Nagpalab-ot ang Archdiocese of Jaro sa mga tumuluo kun ano ka importante ang sanctification sang Holy Spirit nga dapat ikabuhi sang mga tumuluo kadungan sang pagsaulog sang Pentecost Day ukon kaadlawan sang Simbahan subong nga adlaw, Mayo 24.
Sa homily ni Rev. Fr. Michael Reeve Sogo-an, iya ginpahayag nga ini nga adlaw ang naga simbolo sang paglaum nga ang Ginoo padayon nga nagagiya kag nagabulig agud nga magpadayon ang iya mga kaayuhan sa sini nga kalibutan.
Nagpanawagan man ini sa mga tumuluo nga maghimakas gid nga likawan ang paghimo sang sala kag batunon ang espiritwal nga renewal paagi sa pagbaton sang Espiritu Santo kag sang misyon nga ginatugyan sang Ginoo sa kabuhi sang isa ka tawo.
Dugang pa, ginapakita sang Pentecost Day ang kahulugan sang pag-ayo sang mga pilas sang nagligad nga mga kasal-anan kag pagtukod liwat sang bag-o nga kusog kag pagtuo.
Ginapahanumduman man sang simbahan nga padayunon ang misyon kag pag-alagad sa isigkatawo, ilabi na sa pagpalapnag sang pagtuo, paglaum kag paghigugma.
Samtang ginasaulog ang sini nga okasyon, ginahanumdom man sini nga ang Simbahan kabahin sa pagtukod sang mabakod nga pagtuo kag paghiusa sang komunidad.
