Positibo ang Archdiocese of Jaro nga makuha sang “Dapat Isa Lang” Movement People’s Initiative ang 10 percent nga kabilugan nga boto sa pungsod para sa pagpasar sang genuine Anti-Political Dynasty Law sa Pilipinas.
Sa intervew sang Bombo Radyo kay Msgr. Meliton Oso, director sang Jaro Archdiocesan Social Action Center (JASAC), iya ginpahayag nga ila ginalauman nga ila malab-ot ang ini nga numero sang pirma agud dalayon na ini nga mapasa sa Commision on Elections.
Suno kay Msgr. Oso, tungod nga digital na ang pag-gather sang mga pirma, mas mahapos na ini ma-access sang publiko.
Paagi sa website, mahimo na makapirma ang mga Pilipino gamit ang ila cellphone, laptop ukon desktop.
Target sang grupo nga makakuha sang 100,000 ka pirma sa kada probinsya, samtang 30,000 ka pirma naman sa mga botante sa syudad sang Iloilo.
Nagapanawagan man ang Archdiocese of Jaro sang suporta sa mga pumuluyo nga dapat mangin aktibo ang pumuluyo sa mga isyu nga may kaangtanan sa palaabuton sang pungsod.
Nahibaluan nga ang “Dapat Isa Lang” Movement People’s Initiative may katuyuan sa pagdumili sa dululungan nga pagpadalagan, pagbayluhanay sang posisyon, kag pagpasa sang pwesto sa miyembro sang pamilya.
