Napun-an sang drama ang pagdaog sang defending champions nga Argentina sang ika-16 na sini nga titulo sa Copa America sa Hard Rock Stadium sa Florida, Estados Unidos sang Amerika.
Ang football star nga si Lautaro Martinez amo ang isahanon nga naka-goal kag natabo pa ini sa extra-time nga amo ang rason kun ngaa nalutos sang Argentines ang Colombia, 1-0, kag amo man ang naga-marka sang ikatatlo nga sunod-sunod nga major tournament title sang pungsod kasunod sang pagdaog man sa Copa America sang 2021 kag World Cup sa Qatar sang 2022.
Antes ang selebrasyon, malapit 90 minutos nga naatrasar ang hampang bangud sa isyu sa seguridad kag mga tumalan-aw nga nagpamilit nga makasulod sa stadium apisar wala sang tickets. Nangin makaalarma man ang sitwasyon bangud nagkinahanglan na ang iban nga football fans sang medical attention kasunod sang heat exhaustion samtang ang iban naman ang nagtaklas na sa mga pader.
Sa ika-66 nga minuto sang hampang, nakaangkon pa sang injury kag nag-guwa sa hampang ang Argentine captain nga si Lionel Messi. Nakit-an sa bench nga nagahilibion ang decorated football superstar kag eight-time Ballon d Or winner bangud ang Copa America amo ang ginasiling nga isa sa katapusan nga international tournaments nga pasakupan sini antes mag-retiro sa football.
Apisar wala pa sang pormal nga anunsyo si Messi sa iya retirement, nauna na ang abyan sini nga si Angel Di Maria nga emosyonal man sang nagbiya sa pitch bangud ini na ang iya final game kaupod sa national team.
Ang titulo sang Argentines amo ang naghimo sa ila nga pinakamadinalag-on nga team sa maragtas sang Copa America samtang nagapangaduha naman ang Uruguay nga may 15 ka mga titulo.#
