Ginplastar sang isa ka human rights kag public interest lawyer nga indi na importante sa impeachment trial ang argumento sang defense panel nga kinahanglan pa nga pamatud-an sang prosecution nga may ginkontrata nga assassin si Vice President Sara Duterte agud ipapatay sanday Presidente Ferdinand Marcos Jr., First Lady Liza Araneta-Marcos, kag anay House Speaker Martin Romualdez.
Sa interview sang Bombo Radyo kay Atty. Jobert Pahilga, iya ginpahayag nga indi ini ang nagapanguna nga isyu sa Articles of Impeachment kundi ang pamatud-an nga ginhimo ni Duterte ang pahayag nga may ginmanduan siya nga patyon sanday Marcos kun may malain nga matabo sa iya.
Suno kay Pahilga, nahimo sang prosekusyon nga mapresentar sang maathag nga natabo ang amo nga pagpamahog sang bise presidente.
Suno pa sa iya, kumbinsido na man ang publiko nga may natabo nga “betrayal of public trust” gani ang mas dapat tutukan sang impeachment court amo nga kun bastante ang mga ebidensya agud manabat ang Bise Presidente base sa nasaad sa Konstitusyon.
Apang suno kay Pahilga, magadepende sa gihapon sa impeachment court ang desisyon sa ulihi.
Indi naman malipod, suno sa iya, nga may mga senator-judges na nga maathag nga magaboto agud i-acquit si Duterte ilabi na nga ang iban sa ila ang kaangay nga defense counsel na sa trial.
