ILOILO CITY – Ginaimbestigaran na sang kapulisan sa probinsiya sang Guimaras kun ano nga grupo ang nagapanulod-sulod sang mga kabalayan sa probinsiya sang Guimaras sa oras sang kagab-ihon.
Sa interview sang Bombo Radyo Iloilo, ginpahayag ni Police Provincial Office Director S/Supt. Louis Garong nga sapulon sini ang mga chief of police sa probinsiya sang Guimaras agud tutukan ang kaso.
Ginpahayag sang PNP provincial director nga ini ang una nga ti-on nga gindangop sa ila igtalupangod ang isyu.
Sa interview sang Bombo Radyo, ginpahayag ni Punong Barangay Rodolfo Gamuyao sang Barangay Salvacion, Nueva Valencia, Guimaras nga duha ka pamilya na ang nagpa-blotter sa iya matapos nga ginsulod sang indi makilala nga mga suspek ang ila puluy-an.
Duha tubtob tatlo ka tawo nga mga naka-bonnet kag armado sang matag-as nga kalibre sang armas ang nagapanaka-saka sa kabalayan kag nagapangayo sang pagkaon.
Ilan man ginakuha ang makita nga pagkaon sa mga ginasulod nga pamalay samtang may yara man nga nagaluto pa mismo sa kabalayan.
Ginapahayag nga nagikan pa sa Negros ang grupo, apang padayon pa ini nga gina-beripika sang mga otoridad.