Suportado ni Iloilo Police Provincial Office (IPPO) director Police Col. Gilbert Gorero ang panugyan ni Presidente Rodrigo Duterte nga paarmasan ang anti-crime volunteers apang may yara sang mga ginalantaw nga kondisyon.
Sa interview sang Bombo Radyo kay Gorero, iya ginpahayag nga kinahanglanon ini para sa civilian volunteers nga yara sa isolated areas ukon mga lugar nga magamo kag may presensya sang rebelde nga grupo.
Sa probinsya sang Iloilo, partikular na sa mga banwa sang Leon, Tubungan, kag Calinog, may mga barangay officials suno kay Gorero nga nagahingyo nga magtukod sang civilian volunteer groups nga may mga armas.
Suno pa kay Gorero, kun malinong kag matawhay ang lugar, indi naman kinahanglanon nga paarmasan ang civilian volunteers.
Una diri, mismo si Philippine National Police (PNP) Chief Gen. Guillermo Eleazar ang nagpabor sa suhestyon ni Duterte ‘para sa proteksyon’ sang mga volunteers.
Apang una na nga gin-athag sang PNP chief nga required ang anti-crime volunteers nga magkuha sang License to Own and Possess Firearms (LTOPF), ang requirement sa mga sibilyan antes sila makabakal sang armas. Magluwas diri, kinahanglan man ang firearms licenses kag Permits to Carry Firearms Outside Residence.
Nauna naman nga gin-athag sang Malacañang nga bukas lang si Duterte sa sini nga ideya apang indi pa ini subong isa ka polisa sang gobyerno.
