Magahiwat ang Armed Forces of the Philippines sang isa ka Inter-Agency Territorial Defense Operations Exercise sa Hunyo 16-17 sa Miag-ao kag San Joaquin, Iloilo.
Suno kay Ret. PCol. Cornelio Salinas, head sang Iloilo Provincial Disaster and Risk Management Office ukon PDRRMO, iya ginpahayag nga tinutuyo sini nga simulation exercise nga ma-asses ang koordinasyon kag pagbinuligay sang nagkalain-lain nga mga ahensya kaangay sang Philippine Army kag Philippine Disaster Risk Reduction and Management Office kag masiguro ang kahandaan sang depensa kag seguridad sa probinsya sang Iloilo.
Pagapangunahan man ini sang Armed Forces of the Philippines, Philippine National Police, Bureau of Fire Protection, kag Office of the Civil Defense, kaupod ang mga local government units sang Miag-ao, San Joaquin, kag Guimbal.
Pahayag pa ni Salinas, may ara man sang nagkalain-lain nga sitwasyon nga maga-test sang air, water, kag land assets, amo man ang military kag humanitarian response ilabi na sa tiempo sang kalamidad.
Ginpangunahan man ni Salinas ang presentasyon sang mga scenario kag ang mga aktibidad sa nasambit nga kahiwatan.
Pagapatigayunon naman sa Hunyo 16 ang civilian spillover management sa aga samtang ang missile attack simulation naman pagahiwaton sa hapon sa Barangay Igtuba, Miag-ao, Iloilo.
Samtang, sa Hunyo 17, hiwaton sa Barangay Igcondao kag Barangay Cata-an sa San Joaquin, Iloilo ang coastal defense simulation kag anti-infiltration operations sa pagpanguna sang Armed Forces of the Philippines.
Ginabulubanta naman nga masobra 1,000 ka tawo ang mangin kabahin sa simulation exercise.
Pagapondohan sang mga ahensya ang programa pinaagi sang sharing of resources kaangay sang mga pagagamitun nga equipment.
Suno kay Col. Leroy Daanton, Deputy Brigader Commander sang 301st Infantry Brigade, iya ginpahayag nga igapaidalom sa post-evaluation and exercise kaupod ang iban nga government agencies para mahibaluan kun nangin epektibo ang simulation exercise kag kun ano pa ang areas of improvement sang kahiwatan.
Nahibaluan nga ini man ang labing-una nga kahigayunan nga hiwaton ang Inter-Agency Territorial Defense Operations Exercise sa Visayas.
