Ginapatihan sang Federal Bureau of Investigation (FBI) nga 100% nga ginsunod sa Islamic State of Iraq and Syria (ISIS) ang pagpang-atake sa New Orleans kun sa diin gin-arado sang truck ang mga tawo nga nagaselebrar sang New Year.
Suno pa sa FBI, isahanon lamang ang 42-anyos nga suspek nga si Shamsud-Din Jabbar sang ginhimo sini ang krimen.
14 ka mga tawo ang patay sa amo nga lugar kag madamo ang pilason kag patay man ang suspek sang nagbato ini sa mga pulis.
“This was an act of terrorism. It was premeditated and an evil act. He was 100% inspired by ISIS,” suno kay Christopher Raia, deputy assistant director sang counterterrorism division sang FBI.
Isa ka Army veteran ang suspek nga tumandok sang Texas.
Nakit-an man nga may flag sang ISIS sa iya salakyan sang nag-atake ini sa amo nga lugar.
Sa videos sini nga gin-post antes ang pagpang-atake, ginkumpirma sini nga nagsulod gid man siya sa amo nga terorista nga grupo.
Nagguwa nga Disyembre 30 pa sini gin-arkilahan ang Ford F-150 pickup truck sa Houston kag gindala ini sa New Orleans sang Disyembre 31 sang gab-i.
Sang kaagahon sang New Year’s Day, nangtanum pa si Jabbar sang improvised explosive devices sa intersection sang dalan sa Bourbon kag New Orleans kag iban pa nga lokasyon.
Sunod ini nga nagpang-post sang videos sa Facebook nagtuad nga iya kuntani pamilya kag mga abyan ang unahon niya patay. Naghatag man ini sang last will kag testament sa iya katapusan nga video antes sini ginhimo ang krimen.#
