Ginkumpirma ni National Bureau of Investigation (NBI) Director Jaime Santiago nga subong nga aga, Mayo 30, dal-on sa New Bilibid Prison si former Negros Oriental 3rd District Rep. Arnolfo “Arnie” Teves, Jr.
Samtang didto sa Muntinlupa City, magatinir ang former lawmaker sa detention facility sang ahensya.
Pag-abot kagab-i halin sa Timor Lester, ginpatulog anay si Teves sa headquarters sang NBI sa Pasay City. Duha ka maleta ang dala sini kun sa diin nalakip ang iya nga habol kag personal kit.
Suno kay Santiago, yara sa maayo nga sitwasyon ang former congressman matapos ini nagpaidalom sa booking procedures kag sa medical examination.
Magluwas nga si Teves ang prime suspect sa pagpapatay kay Negros Oriental Gov. Roel Degamo sang 2023, nagapangatubang man ini sang iban nga kaso lakip na ang ginaalegar nga pagpatay sa tatlo ka mga tawo sa Negros Oriental sang 2019.
Gin-tag man siya sang Anti-Terrorism Council bilang terorista bangud sa ginaalegar nga pagpamatay kag pagpang-harass sa Negros Oriental.
Ginsipa siya halin sa Kamara sang Agusto 2024 bangud sa padayon nga pag-absent kag disorderly conduct.
