Ginklaro sang Department of Justice (DOJ) nga wala ginhilway si anay Negros Oriental Congressman Arnolfo “Arnie” Teves, Jr. bangud sa pagkamatuod, gindakop ini liwat sang Timor-Leste police samtang nga padayon pa nga ginahikot sang Pilipinas ang extradition.
Ini nga statement sang ahensya ang kasunod sang gin-claim sang legal counsel ni Teves nga si Atty. Ferdinand Topacio nga ginpaguwa na ang anay kongresista sa preventive detention sa Becora Prison sa Dili, Timor Leste,
Gin-claim man ni Topacio nga “out of time” na ang request sang Philippine government para sa extradition kag sa paagi nga indi sanctioned sang practice kag customary international law, rason nga gindeklarar nga iligal ang pagpreso kay Teves sa amo nga pungsod.
Apang kun basehan ang pahayag ni DOJ spokesperson Mico Clavano, isa ka procedural release ang natabo kun sa diin gindala man liwat si Teves sa kustodiya sang local police.
“The release and subsequent re-arrest of the former congressman from prison to the Polícia Nacional of Timor Leste is part of the country’s process,” pahayag ni Clavano. “The Department was able to submit all requirements ahead of time and in a manner fully compliant with Timor Leste’s law.”
Gintawag man ni Clavano nga iresponsable, misleading, kag insulto sa Pilipinas kag Timor Leste ang ginpaguwa nga statements sang abogado ni Teves.
“Thus, the statements of Atty. Topacio are misleading, highly irresponsible and an insult to both countries. He ought to know that while he owes fealty to his client, he remains an officer of the court and must act accordingly to maintain its majesty and integrity,” suno sa DOJ official.
Si Teves amo ang ginatudlo nga mastermind sa pagpapatay kay anay Negros Oriental governor Roel Degamo sang Marso 4, 2023. Sang Marso subong nga 2024, nadakpan siya sa Dili, Timor-Leste kasunod sang red alert notice nga ginpaguwa sang International Criminal Police Organization (Interpol).
Magluwas diri, ginkasuhan man si Teves bangud sa ginaalegar pagpatay sa tatlo ka iban pa nga mga tawo sa Negros Oriental sang 2019. Sa kasagsagan sini nga mga kaso, ang kongresista kag ang 12 ka iban pa nga mga tawo ang gin-designate sang Anti-Terrorism Council bilang “terorista” bangud sa ginaalegar pagpamatay kag pagpang-harass sa Negros Oriental.
Agusto 2023 naman sang ginsipa ini halin sa Kamara bangud sa padayon nga pag-absent sa trabaho apisar sang iya nga expired na nga travel authority.
Suno kay Clavano, ang mayor nga direksyon sang Pilipinas amo gihapon ang extradition base sa framework sang United Nations Convention on Transnational Organized Crime (UNTOC) kun sa diin pareho nga signatories ang duha ka pungsod.#
