Gin-release na gikan sa house arrest sa Timor Leste ang anay kongresista sang Negros Oriental nga si Arnolfo “Arnie” Teves, Jr.
Sandig ini sa statement nga ginpaguwa sang iya legal counsel nga si Atty. Ferdinand Topacio subong nga Sabado.
“We confirm the published reports appearing on Timor Leste (TL) media — which have reached our country — to the effect that Rep. Arnolfo Teves has been ordered released from house arrest by the tribunal conducting extradition proceedings relative to the request made by the Philippine government,” suno kay Topacio.
May mga kondisyon nga gin-set kadungan sang pagpaguwa sa iya suno sa abogado lakip na ang regular nga pag-report sa court officer kag commitment nga indi magbiya sa Timor Leste samtang pending pa ang extradition case.
“Otherwise, he has been restored to full liberty in accordance with the order of the TL high court’s voiding of the preventing detention order due to defects in the extradition request,” dugang sang legal counsel.
Una na nga gin-anunsyo sang Department of Justice (DOJ) sini lang nga semana nga natapos na ang extradition trial sa anay mamalidha.
Ini nga trial sa Timor-Leste Court of Appeals ang nag-ugat sa request sang Philippine government nga isaylo si Teves sa Pilipinas kun sa diin nagapangatubang siya sang kaso nga murder bangud siya ang ginatudlo nga mastermind sa pagpapatay kay anay Negros Oriental Governor Roel Degamo sang Marso 4, 2023.
Sulit-sulit nga ginpanginwala ni Teves ini nga alegasyon kag ginrason nga wala siya sa pungsod sang tion nga natabo ang pagpatay kay Degamo. Halin sang amo nga petsa, wala nakapauli si Teves diri sa Pilipinas.
Magluwas sa ginaalegar nga involvement sa Degamo massacre, ginkasuhan man si Teves bangud sa ginaalegar pagpatay sa tatlo ka iban pa nga mga tawo sa Negros Oriental sang 2019. Sa kasagsagan sini nga mga kaso, ang kongresista kag ang 12 ka iban pa nga mga tawo ang gin-designate sang Anti-Terrorism Council bilang “terorista” bangud sa ginaalegar pagpamatay kag pagpang-harass sa Negros Oriental.
Agusto 2023 naman sang ginsipa ini halin sa Kamara bangud sa padayon nga pag-absent sa trabaho apisar sang iya nga expired na nga travel authority.#
