Nabalik na sa Pilipinas kag natalana nga mag-atubang sa iya sampaw-sampaw nga mga kaso ang anay kongresista sang third district sang Negros Oriental nga si Arnolfo “Arnie” Teves, Jr.
Si Teves amo ang ginatudlo utok sa pagpatay kay anay Negros Oriental Gov. Roel Degamo sang Marso 4, 2023 sa iya mismo nga puluy-an sa Pamplona, Negros Oriental. Sa amo nga massacre nga ginhimo mismo sa tungang-adlaw, patay man ang siyam ka iban pa nga mga tawo nga natabuan nga didto sa area.
7:40 kagab-i sang naghugpa para sa stopover sa Davao City ang eroplano sang Philippine Air Force kun sa diin sakay si Teves halin sa Timor Leste. Sang pasado 11:00 na sa gab-i, nag-abot ang eroplano sa Villamor Air Base sa Pasay City.
Halin didto, gindala ang anay kongresista sa National Bureau of Investigation (NBI) headquarters sa Manila kun sa diin ginpaidalom ini sa booking procedure kag medical examination.
Subong nga aga, natalana ini nga dal-on sa detention facility sang NBI sa New Bilibid Prison sa Muntinlupa City.
Sa press statement ni President Ferdinand “Bongbong” Marcos Jr. matapos gin-deport sang Timor Leste ang former lawmaker, ginpahayag sini nga ginasigurado sang iya administrasyon nga manabat ang tanan nga nagahimo sang krimen.
Espesyal nga ginpasalamatan sang punong ehekutibo si Timor-Leste Prime Minister Xanana Gusmao kag si President Jose Ramos-Horta bangud natigayon nga napabalik sa pungsod si Teves.
“We would like to assure out citizens that such lawlessness will not go unpunished. It is now time for Arnie Teves to face justice,” kabahin sang video statement ni President Marcos.
Nahibaluan nga nagapangatubang man ang former lawmaker sang iban nga kaso lakip na ang ginaalegar pagpatay sa tatlo ka mga tawo sa Negros Oriental sang 2019.
Gin-tag man siya sang Anti-Terrorism Council bilang terorista bangud sa ginaalegar nga pagpamatay kag pagpang-harass sa Negros Oriental.
Ginsipa siya halin sa Kamara sang Agusto 2024 bangud sa padayon nga pag-absent kag disorderly conduct.
