Nagakinahanglan na nga ipaidalom sa isa ka “major surgery” si anay Negros Oriental 3rd District Rep. Arnolfo “Arnie” Teves Jr., suno sa iya abogado nga si Atty. Ferdinand Topacia, ini matapos ma-ospital bangud sa palanakit sa tiyan.
Suno kay Topacio, gin-examine si Teves sa isa ka government hospital kahapon nga adlaw, kad didto ginpahayag sang mga doctor nga kinahanglan niya sang dako nga operasyon sa isa ka ospital nga may kumpleto nga mga kagamitan.
Nagpamalibad si Topacio nga ibulgar ang ensakto nga diagnosis sang mga doctor, bangud suni sa iya, indi siya pwede maghatag sang impormasyon angut diri.
Dugang pa niya, nahatagan na sang notice ang tanan nga korte nga may ginapangatubang nga kaso si Teves tuhoy sa iya kahimtangan subong.
Madumduman nga ginapangatubang ni Teves ang 10 ka kaso sa murder, 14 sang frustrated murder, kag apat ka kaso sang attempted murder.
Ang mga kaso nga ini ang may kaangtanan sa Pamplona Massacre sang tuig 2023 kun sa diin napatay si anay Negros Oriental Governor Roel Degamo kag siyam pa ka mga indibidwal.
Matapos ang halos duha ka tuig nga pagpanago sa iban nga pungsod, nadakpan si Teves sa Dili, Timor-Leste sang Mayo 28 kag gilayon nga na-deport pabalik sa Pilipinas.
