Gin-klaro sang isa ka eksperto nga ang ”aro” ukon leprosy isa ka sakit nga puwede mag-ayo kag indi dapat pagkahadlukan.
Ini kaangay man sang impeksyon nga naghalin sang bacteria ukon mikrobyo nga naga-epekto sa immune system sang isa ka tawo.
Sa interview sang Bombo Radyo kay Dr. Aileen Adela Montero, iya ginpahayag nga indi dapat pagkabalak-an sang publiko ang ”aro” ukon leprosy bangud ang bulong para diri libre halin sa World Health Organization kag ginahatag bisan pa maglab-ot sang duha ka tuig nga pag-inom sini.
Ginpahayag man ni Dr. Montero nga ndi ini isa ka salot kag indi pareho sang mga sakit nga madali makalaton sa iban.
Gin-athag man sini nga nagadepende ang pag-develop sini sa kahimtangan sang immune system sang isa ka tawo.
Suno pa sa iya nga kun ang pasyente naga-inom na sang bulong, indi na ini makalalaton.
Ginpahayag man ni Dr. Montero ang mga early signs nga mahimo makita bilang patchy ang panit sang tawo nga daw kaangay sang alap-ap.
Gin-athag man nila nga health authorities nga tanan nga komplikasyon kaangay sang ”aro” mahimo malikawan kun timprano pa ini mahibaluan kag matatapan sang pagbulong.
Suno pa kay Dr. Montero, katuyuan sang selebrasyon sang Leprosy Month amo ang pag-edukar sa publiko, mapalapnag sang husto nga impormasyon nahanungod diri kag importante nga mapa-intindi sa iban nga tawo nga mabulong ini kag indi dapat pagsikwayon ang iban nga naga-experiensya sang ”aro” ukon leprosy.
