Ginpa-Bombo sang pila ka mga residente sang Barangay Tolarucan, Mina, Iloilo ang arosera ukon rice mill nga ginapanag-iyahan ni Mayor Rey Grabato.
Sa interview sang Bombo Radyo kay Alma Reyna, iya ginpahayag nga indi na gid ma-agwantahan ang girok nga tuga sang arosera.
Suno kay Reyna, 2018 pa sang ginpalab-ot nila sa local government unit sang Mina ini nga isyu.
Apang sa baylo nga pamatian sila ni Mayor Grabato, ginakwestyon pa ang ila pagpatindog sang balay sa amo nga duta kun sa diin nahamtang ang arosera.
Pahayag niya nga nabutang sa alang-alang ang ila ikaayong lawas bangud halos ginsakop na sang girok ang ila nga puluy-an, mga hinalay nga nilabhan kag pananum.
Indi naman suno sa iya makahampang ang mga kabataan saggwa sang balay bangud tuman ka katol sang yab-ok nga nagadapya halin sa rice mill.
Nagpalab-ot naman ang natungdan sang reklamo sa Environmental Management Bureau (EMB) kag natalana nga magpatigayon ang amo nga ahensya sang technical conference agud matsikyar ang isyu.
Depensa naman ni Mina, Iloilo Mayor Rey Grabato sa reklamo, antes siya nagpatindog sang rice mill, ginsunod gid niya ang comprehensive land use plan.
Sa interview sang Bombo Radyo kay Grabato, iya ginpahayag nga bag-o pa man napatindugan sang mga pamalay ang palibot sang arosera, yara na dira ang amo nga rice mill nga mas ginpasangkad lang sa sulod sang pila ka-tuig.
Suno kay Grabato, agro industrial ang zoning sang lugar kag sang gintsikyar nila ang ginpatindog nga balay sang pamilya Reyna nga nagareklamo sang girok, wala sila sang Environmental Compliance Certificate ukon ECC permit.
Ini posible ang rason suno sa alkalde kun nga-a indi mahangpan sang pamilya ang nature sang rice mill.
Pahayag sang alkalde, nangin source na sang palangabuhian sang indi magnubo sa 300 ka mga mamumugon ang ginareklamo nga arosera kag kun ipauntat lang ang operasyon sini, pat-od nga madulaan sang trabaho ang ginatos ka indibidwal.
