Liwat nga gin-postpone subong nga adlaw sang Quezon City Regional Trial Court Branch 98 ang arraignment ni Vice President Sara Duterte kaangot sa three-counts sini nga kaso sa grave threats.
Suno sa abogado sini nga si Atty. Paul Lawrence Lim, liwat nga tun-an sang judge ang mosyon sang defense team nga liwat ikonsiderar ang nauna nga desisyon sang korte, amo man ang petisyon nila sa Korte Suprema.
Wala pa napagwa ang bag-o nga petsa sang arraignment.
Ini na ang ikaduha nga pag-postpone sang arraignment sang bise presidente matapos sadtong Setyembre 11.
Una na nga wala ginbaton sang hukom ang pangabay sang depensa nga mag-inhibit, apang ginpahanugutan lamang ang pagpostpone sa arraignment.
Nahibaluan nga nagapangatubang ang bise presidente sang tatlo ka counts sang kaso sini nga grave threats kaangot sa pagpamahog kanday Pres. Ferdinand ‘Bongbong’ Marcos Jr, first lady Liza Araneta-Marcos, kag anay House Speaker Martin Romualdez.
Sa matandaan nga nagpagwa sang warrant of arrest ang korte sadtong Setyembre 4 kag nakapyansa si Duterte sadtong Setyembre 5.
Nagpasalamat naman si Duterte sa iya mga abogado, mga abyan, kag tagasuporta sa padayon nga nagasuporta kag nagapati sa iya.
