ILOILO CITY – Sa tion nga magpadulong kita sa mga museum, ang masami nga ginahambal sa aton amo nga indi gid pagtandugon ang mga art installation.
Apang sa South Korea, isa ka art major student sa Seoul National University ang wala lamang nagtandog sang art installation kundi, ginkaon gid niya ini.
Sa Leeum Museum of Art sa Seoul, ginkaon ni Noh Huyn-soo ang saging nga kabahin sang installation sang Italian artist nga si Maurizio Cattelan.
Sa video nga kuha sang iya mga classmates, makita nga ginakaon ni Noh ang saging kag ginpatapik man sa dingding gamit ang duct tape nga gingamit sa pagpakabit sang saging.
Nagyuhom pa ini sa camera antes naglakat.
Ang artwork nga ginatawag nga “Comedian” ang isa sa biggest viral moments sa bilog nga kalibutan sang ginbaligya ini sa balor nga $120,000 ukon P6.6 million sa Art Basel Miami Beach sang December 2019.
Ang duha pa ka editions sang piece ang ginbaligya sa amo nga fair.
Ang 2019 artwork ang ginbutang sa Seoul-based museum kag magalawig tubtob sa Hulyo 16 suno sa The Korea Herald.
Ang saging ang gina-islan sa tagsa ka duha tubtob tatlo ka adlaw, kag wala ginabaligya.
Sang ginpamangkot si Noh sa iya motibo, ginpahayag sini nga nagutom lamang ini bangud nga wala nakapamahaw.
Sang ulihi, ginpahayag sini nga ang pagguba sang modern art ang makabig man nga artwork.
Wala naman sang may ginhatag nga penalidad ang museum batuk sa estudyante.
