ILOILO CITY-Nakahanda ang mister nga atubangon ang kaso nga ipasaka sang iya misis matapos madakpan kaupod ang iya kerida sa lodging house sa La Paz Iloilo City.
Ang mister amo si Honor, 56 sang La Paz, Iloilo City may asawa kag tatlo ka mga kabataan.
Samtang ang kerida naman amo si She She 43, sang Guimaras kag may bana nga seafarer.
Sa exclusive interview sang Bombo Radyo kay Honor, iya ginpahayag nga atubangon sini ang kaso nga concubinage nga ipasaka sang iya misis nga si Rena, 55.
Nahibaluan nga madugay na nga nagaduda ang misis nga may iban nga karelasyon ang iya bana sa diin nabasahan niya mismo ang mga mensahe sini sa iya kerida sa cellphone.
Patago nga ginsundan ni Rena si Honor sang naglesensya ini nga maglakat tubtub nasundan niya sa lodging house.
Nagpangayo naman sang bulig si Rena sa mga pulis sa diin gintuktok nila ang room 63 kag didto nakit-an nga nakailis na ang bana kag kerida sini.
Suno kay Honor, wala na ini sang may mahimo kun pasakaan sang kaso sang iya misis.
Nagpamalibad naman ini nga maghatag sang kumento tuhoy sa epekto sang iya ginhimo sa iya mga kabataan nga lunsay na mga professionals.
Samtang suno naman sa kerida nga si She She, nagpangayo na ini sang pasaylo sa misis ni Honor.
Sa exclusive interview sang Bombo Radyo kay She She, iya ginpahayag nga naghalok pa ini sa tiil sang misis ni Honor samtang nagapangayo sang pasaylo.
Nanginwala man si She She nga karelasyon niya si Honor.
Gin ako man niya nga nagtuga sang dako nga kahuy-anan ang ila ginhimo ni Honor.
