Indi mahangpan sang bana sang isa ka Overseas Filipino Worker (OFW) kun ano ang matuod nga rason sang paghikog sang iya asawa sa diin ginlive pa niya sa Facebook.
Ang biktima amo si alyas Julie, OFW sa Riyadh, Saudi Arabia, tumandok sang New Lucena, Iloilo apang nagapuyo sa Constancia, San Lorenzo, Guimaras.
Sa interview sang Bombo Radyo kay alyas Noknok, bana sang biktima, 36, iya ginpahayag nga ginkakibot sang bug-os nila nga pamilya ang ginhimo ni Julie.
Suno kay Noknok, sa masobra 10 ka-tuig nga updanay nila sang iya asawa, wala siya makahibalo kun paano niya ini nahimo ilabi na nga may duha sila ka kabataan.
Ginpahayag ni Noknok nga naka-istorya pa sila sang iya asawa pinaagi sa video call kag nangamusta pa ini may kaangtanan sa kahimtangan sang ila duha ka kabataan.
Apang sang Sabado sang gab-i, Marso 6, naglive si Julie sa iya facebook kag didto na nagbitay sa kusina sang balay sang iya gina-obrahan.
Gin-ako man ni Noknok nga siya ang ginabasol sang pamilya ni Julie bangud ginaalegar sang mga ini nga nagpangimon ang iya asawa bangud ginapahayag nga may iban siya nga babaye.
Gin-athag man ni Noknok wala siya sang iban nga karelasyon.
