Nagdangop na sa Criminal Investigation and Detection Group (CIDG) Region VI ang asawa sang pinuno sang Health and Sanitation Division sa Iloilo Fish Port Complex nga ginluthang-patay.
Ang biktima amo si Glen Peremne, 42 anyos, residente sang Barangay Calaparan, Arevalo, Iloilo City, anay katapo sang Bureau of Fire Protection (BFP) kag utod ni the late Jail Senior Supt. Gilbert Peremne, ang assistant regional director sang Bureau of Jail Management and Penology (BJMP) Region 6 nga napatay man bangud sa cardiac arrest.
Sa interview sang Bombo Radyo kay Police Major Jess Baylon, pinuno sang CIDG Region VI, iya ginpahayag nga nagresponde ang asawa ni Peremne sa ila nga hingyo nga kooperasyon agud maghatag sang dugang nga impormasyon sa kaso sang iya bana sa diin desidido man ini nga magpasaka sang kaso.
Suno kay Baylon, kaangot sini, nagpadala naman sila sang letter of request sa opisina sang Iloilo Fish Port Complex agud ma-imbestigaran ang pila ka mga personnel nga posible may kaangtanan sa kaso ni Peremne.
Pahayag sang natungdan, may ginakaptan naman sila nga mga impormasyon angot sa kaso ni Peremne apang indi pa nila ini mawaragwag sa publiko samtang wala pa natapos ang ila parallel investigation.
