ASEAN delegates, 'satisfied' sa pag-host sang Iloilo sang Ministerial Meeting.

ILOILO CITY – Ginpasiguro sang Association of Southeast Asian Nations (ASEAN) ang hugot nga implementasyon sang international laws para sa kaayuhan sang mga kababaihan kag migrant workers, matapos ang isa ka semana nga Ministerial Meeting sa Iloilo City.
Sa interview sang Bombo Radyo Iloilo, ginpahayag ni Rebeca Geamala, director sang Department of Social Welfare and Development (DSWD) Region 6, ginpahayag sini nga ginkasugtan sang mga member nations ang pagpasar sang laye para sa proteksyon sang kinamatarong sang mga kababaihan kag migrant workers.
Samtang nagbilib naman ang mga delegado, sa pag-host sang Iloilo City sa ASEAN Meeting.
Ginpahayag sa Bombo Radyo ni Junnel Ann Divinagracia, pinuno sang City Tourism Development Office kag executive director sang Local Organizing Committee sang ASEAN, kuntento ang mga ini sa accomodation nga sa Iloilo lang nila na-eksperyensiyahan.
Gindayaw sang ASEAN delegates ang manamit nga seafoods kag nagalaum nga liwat ang mga ini makabalik sa Iloilo bilang turista.
Magluwas sa pagkaon, nagbilib man ang mga delegado sa produkto nga himo sang mga Ilonggo kaangay sang Hablon ukon textile sang Oton kag Miag-ao.
Bangud sa madinalag-on nga pag-host sang Iloilo City sa ASEAN Ministerial Meeting, lauman na suno kay Divinagracia ang madamo pa nga international conventions nga hiwaton sa siyudad.