Nagapanawagan ang foreign ministers sang Association of Southeast Asian Nations (ASEAN) sa tanan nga Partido nga respetuhon ang ceasefire para malikawan nga maglala ang gamo sa Middle East.
Sa isa ka joint statement, nagpahayag sang pagkabalaka ang regional bloc sa nagalala nga sitwasyon kag nagpahayag man sang suporta para sa mga ginahimo nga paghimakas para sa kalinong sa rehiyon.
Ginpasangkad pa sang mga foreign ministers nga kinahanglan magapabilin nga naga-ugyon sa international law kag United Nations Charter ang tanan nga ginahimo nga tikang sang mga apektado nga partido.
Nagpabutyag man ang ASEAN sang ila suporta sa mga global nga inisyatibo nga ginapangunahan sang United Nations, nga may handom nga mapahagan-hagan ang tensyon kag masugudan ang maayo kag konstruktibo nga pag-estoryahanay sa tunga sang mga kasumpong.
