Itinuturing ng Pilipinas ang sarili bilang key player sa lumalaking cruise tourism network ng ASEAN matapos ang matagumpay na ASEAN Tourism Forum (ATF) 2026 sa Cebu.
Ayon kay Tourism Secretary Christina Garcia-Frasco, itinuring ng ASEAN tourism ministers ang cruise tourism bilang pangunahing produkto sa ilalim ng ASEAN Tourism Strategic Plan, na maaaring magbukas ng multi-country itineraries at magpakilala sa mga isla ng Pilipinas sa mga banyagang turista.
Kasama sa plano ang pag-promote ng cruise tourism kasama ang heritage at culture, gastronomy, health and wellness, at nature and adventure tourism, upang makalikha ng seamless at mataas na kalidad na travel experiences sa buong rehiyon.
Binanggit ni Frasco ang mga hakbang na ginawa ng Pilipinas, kabilang ang natapos na cruise port sa Siargao at mga proyekto kasama ang Philippine Ports Authority para mapalawak ang cruise-ready destinations. Ayon sa Bureau of Immigration, mahigit 56,000 cruise tourists ang bumisita sa bansa, karamihan ay first-time visitors.
Bukod sa cruise tourism, sinabi ni Frasco na ang matagumpay na ATF ay nagpapatibay sa suporta para sa regional connectivity, kabilang ang mas maraming air at sea routes, at binigyang-diin ang kahalagahan ng public-private partnerships para sa infrastructure, tulad ng airport upgrades sa Laguindingan, Puerto Princesa, at Iloilo.
