Naglab-ot sa masobra 840 ka kilo sang pork kag pork products ang nakumpiskar sang Iloilo African Swine Fever Task Force sa lain-lain nga pantalan, airports, kag entry points sa probinsya sang Iloilo halin sang Enero tubtub sa bulan sang Marso subong nga tuig.
Lakip sa nakumpiskar amo ang mga pork tapa, pork tosino, chicharon, pork longganisa, marinated pork, siomai, pork adobo, cooked ham, kag mga imbutido.
Nagikan ini nga mga produkto sa National Capital Region, North Cotabato, kag may yara man nga halin sa Batangas.
Sa interview sang Bombo Radyo kay Provincial Veterinary Office (PVO) Head Dr. Darel Tabuada, iya ginapahayag nga ginpangsunog ang amo nga mga produkto sa incinerator machine sa Pototan kag sa banwa sang Badiangan.
Sandig ini sa Provincial Ordinance on African Swine Fever (ASF) kun sa diin nakasaad nga ginadumilian nga makasulod sa probinsya ang mga pork products halin sa ASF-infected areas agud nga makudalan man ang hog industry sa Iloilo. ##
