Nalutos ang Filipinas sa kamot sang powerhouse team nga South Korea, 1-5, sa group stage sang 19th Asian Games sa Wenzhou Sports Center Stadium sa China.
Si Sarina Bolden — ang forward nga una man nga naka-goal sa Pilipinas sa debut game sang team sa FIFA World Cup kag sa Asiad — amo ang isahanon nga nakahatag sang goal sa Pilipinas sa ika-walo nga minuto sang hampang.
Wala nagdugay ang selebrasyon sang Filipino fans bangud pag-abot sa ika-dose nga minuto, napatas sang South Korea ang skor paagi sa goal ni Chun Garam.
Pag-abot sa second half, nag-umpisa na ang lead sang South Koreans sang nakapasulod si Son Hwayeon sa ika-44 nga minuto; ginsundan sang team captain nga si Ji So-yun; kag ginpasagunsunan ni Son sa ika-56 kag ika-69 nga minuto nga nagkumpleto sa iya hat trick.
Nagapanguna na subong ang South Korea sa Group E nga may anum ka puntos sa duha ka hampang. Sa pihak nga bahin, may tatlo ka puntos naman ang Filipinas matapos ginlutos ang Hong Kong, 3-1, sa imbukada sang tournament.
Sa Huwebes, kinahanglan nga lutuson sang Philippine women’s national football team ang Southeast Asian rival sini nga Myanmar agud nga makaabanse sa knockout round.
Nahibaluan nga ang winners sa lima ka grupo kag ang tatlo ka best second-placed teams amo ang maga-abanse sa masunod nga round. #
