Nag-abanse na ang Filipinas sa quarterfinals sa women’s football sa 19th Asian Games matapos ginlutos ang Myanmar, 3-0, sa ulihi nga group match sa China.
Ang forward kag scoring leader sang team nga si Sarina Bolden ang nakahimo sang una nga goal para sa Filipinas paagi sa iya penalty kick sa ika-19 nga minuto nga amo ang naghatag sa pungsod sang 1-0 lead sa halftime.
In photo: Philippine women’s football team in the Asian Games. –PWNT/PFF
Sa ika-60 nga minuto, nag-skor sang ikaduha nga goal para sa Filipinas si Sara Eggesvik kasunod sang header pass halin kay Bolden; kag isa ka minuto lamang ang nagligad, sang ginpasa na ni Meryll Serrano ang bola, napasulod ini liwat ni Eggesvik.
Ang Pilipinas nga amo ang reigning AFF Women’s Champions ang nagkuha sang ikaduha nga pwesto sa Group E, kag nalakip sa tatlo nga best second-placed teams nga amo ang rason nga naka-abanse ini sa knockouts.
Patigayunon ang quarterfinal matches sa Sabado kun sa diin atubangon sang Filipinas ang powerhouse team sang Japan. Mahampang ang team nga wala si Katrina Guillou bangud nagbalik na ini sa iya club sa Sweden.
Antes sang hampang sa Myanmar, nagdaog ang Filipinas sa Hong Kong, 3-1, kag nalutos sa South Korea, 5-1, sa group phase. #
