Magasaka na sa kumpetisyon sa 19th Asian Games subong nga adlaw, Oktubre 2, ang labing-una nga Olympic champion sang Pilipinas nga si Hidilyn Diaz.
Ang 32-anyos nga weightlifting star halin sa Zambonga City ang nagatuyo nga makakuha sang sunod-sunod nga gold medal matapos nga nabulsa man ang bulawan nga medalya sa Asian Games sa Jakarta sang 2018 sa 55-kg. division.
Apang subong nga adlaw, daku ang pagpanghangkat kay Diaz bangud magasaka ini sa 59-kg. women’s division bangud nga wala na sang 55kg. sa Paris Olympics sa 2024.
Kun balikan, sang nagligad nga sinemana, nagpasakop si Diaz sa amo nga division sa 2023 World Championships sa Riyadh apang nagpang-pito lamang ini sa ranking.
Sa sini nga kumpetisyon, tinguhaan sini nga makakuha sang slot para sa iya nga ika-lima nga sunod-sunod nga pag-qualify sa Olympiada.
