Ginbida sang isa ka Pinoy Chief ang ‘Asin Tultul’ sa Turin, Italy.
Ang Tultul ang isa ka organic nga asin nga may gata kag makit-an sa Barangay Hoskyn, Jordan, Guimaras.
Sa interview sang Bombo Radyo kay Alejo Vincent Abawan, president sang Guimaras Slow food, iya ginpahayag nga malipayon ini nga nahatagan sang kahigayunan ang Slow Food Cooks Alliance of Visayas nga magpasakop sa Terra Madre Salone del Gusto 2024 sa Turin, Italy.
Suno kay Abawan, ang Terra Madre ang isa ka international event nga nakatutok sa food politics, sustainable agriculture kag environment.
Diri kag ginbida sini ang mga luto nga Pinoy kaangay na lang sang Inasal, KBL (Kadyos, baboy, langka) kag Kinilaw sa diin naggamit ini sang salted blue marlin kag salted duck eggs.
Apang ang ginpabugal sini amo ang paggamit sini sang ‘Asin Tultul’ sa tanan sini nga linuto.
Gindayaw naman sang iban nga mga pungsod nga nagpasakop sa kahiwatan ang ginluto sini nga pagkaon.
