Gin-ako sang Anti-squatting and Illegal Structures Unit (ASIS-U) nga wala na nagpamalabag ang kampo sang Team Sulong Gugma kasunod sang ila nga pagkakas sang tarpaulins sa Brgy. San Rafael, Mandurriao, Iloilo City.
Sa interview sang Bombo Radyo kay Mr. Love Joy Hosenilla, head sang Anti-squatting and Illegal Structures Unit (ASIS-U), iya ginpahayag nga nagkoordinar sila sa caretaker sang building kon sa diin, nangin matawhay ang ila nga pagbaklas sang tarpaulin.
Wala naman naglapaw sa 20-minutos ang ila nga pagpangkakas sang amo nga tarpaulin.
Suno kay Hosenilla, nabaton sang abogado sang Team Sulong Gugma kahapon nga adlaw ang notice sang Office of the Building Official (OBO) antes sila nga nagpatigayon sang tikang.
Nag-request man ang talatapan sang bulig paagi sa boom truck halin sa City Engineering Office agud mas masulhay ang pagkakas sang streamer.
