Ginkumpirma sang Israeli government nga may nagpalupad sang drone sa balay ni Prime Minister Benjamin Netanyahu sa Mediterranean coastal town sang Caesarea sa Israel.
Wala ang opisyal kag ang iya asawa sa amo nga balay sang amo nga tion kag wala man sang kumpirmado nga casualties.
Sa statement sa X, ginsiling ni Netanyahu isa ka daku nga sala ang tuyo sang Hezbollah nga proxy sang Iran nga i-assassinate siya kag ang iya asawa.
Ginsiling sini nga indi siya malingkang kag ang Israel; sa baylo, magapadayon sila sa gyera batok sa ila mga kasumpong.
Ginsulit man sini ang iya masami nga linya nga pabayaron niya sang mahal ang mga tawo nga gusto maghalit sa Israel, kag pangpapason ang mga terorista nga maga-atake sa ila.
“The attempt by Iran’s proxy Hezbollah to assassinate me and my wife today was a grave mistake. This will not deter me or the State of Israel from continuing our just war against our enemies in order to secure our future. I say to Iran and its proxies in its axis of evil: Anyone who tries to harm Israel’s citizens will pay a heavy price. We will continue to eliminate the terrorists and those who dispatch them,” pahayag sini.
Nagpahayag man sini nga bawion nila ang tanan nga bihag nga yara sa Gaza nga gindala sang Hamas militants.
“We will bring our hostages home from Gaza. And we will return our citizens who live on our Northern border safely to their homes,” kabahin sang statement. “Israel is determined to achieve all our war objectives and change the security reality in our region for generations to come. Together, we will fight, and with God’s help – together, we will win.”
Wala pa nagkomento ang militante nga grupo nga Hezbollah sa amo nga “assassination attempt” apang ila ginkumpirma nga nakapatigayon sila sang rocket attacks sa northern kag central Israel.
Bilang balos, naglunsar man ang Israel sang 10 ka airstrikes sa nabagatnan nga bahin sang Beirut, Lebanon ukon sa area nga ginatawag nga Daniyeh nga isa ka populated area kun sa diin nahamtang ang mga opisina sang Hezbollah.
