ILOILO CITY – Welcome para kay Iloilo City Mayor Jed Patrick Mabilog ang assignment ni Chief Inspector Jovie Espenido sa Iloilo.
Ini matapos ginpahayag ni Presidente Rodrigo Duterte kadungan sang pagdumdom sa National Heroes Day nga ang Iloilo ang sunod nga assignment ni Espenido.
Sa ginpadala nga mensahe ni Mayor Mabilog sa Bombo Radyo, ginpahayag sini nga nagalaum siya nga makabulig si Espenido agud matapna ang iligal nga droga sa Iloilo.
Pat-od suno sa alkalde nga may matun-an ang siyudad sa experience ni Espenido sa kampanya batok sa illegal drugs ilabi na sa pagtumod sang mga bag-o nga players sa illegal drug trade kag kun diin ang mga ini nagapanago.
Suno kay Mayor Mabilog, nakahanda siya nga magtrabaho ang nasambit nga police official kag bukas siya sa mga ideya kun paano mapasanyog ang kampanya batok sa iligal nga droga.
Dugang pa sang alkalde sang siyudad, ipakigbahin niya kay Espenido ang mga istratehiya sang city government sa away kontra droga kag looking forward ini nga makatrabaho si Espenido.
Una na ginpahayag ni Mayor Mabilog nga wala siya mahadlok nga ma-assign si Espenido sa Iloilo bangud wala man siya sang may ginahimo nga malain.
Si Mabilog ang ginhingadlan sadto ni Presidente Rodrigo Duterte nga drug protector kag gintawag ang Iloilo nga “most shabulized city” kag “bedrock of illegal drugs”.