ILOILO CITY – Bukas ang duha ka kamot nga ginabaton sang Iloilo City Police Office (ICPO) si Chief Insp. Jovie Espenido.
Ini ang ginpasiguro sa Bombo Radyo ni ICPO director S/Supt. Remus Zacharias Canieso, kasunod sang mandu ni Presidente Rodrigo Duterte nga ang Iloilo ang masunod nga assignment ni Espenido.
Suno kay Canieso, nagahulat lang siya sang mandu gikan sa matag-as nga opisyal para sa assignment ni Espenido apisar wala pa sang pat-od kun sa siyudad ukon sa probinsiya ini mabutang.
Ginpahayag ni Canieso nga “perfect timing” ang pag-assign kay Espenido sa Iloilo bangud damo ang kulang nga opisyal sang Iloilo City Police Office.
Dugang pa ni S/Supt. Canieso, kun siya ang pasugtan, ibutang sini si Espenido sa unit kun sa diin ini epektibo kag magamit ang iya “expertise”.