Ginakwestyon sang Association of Taxi Operators in Panay (ATOP) ang pagsulondan sang Grab Car sa Iloilo nga nangin rason man kon ngaa mahina ang byahe sang mga taxi.
Sa interview sang Bombo Radyo kay Mr. Perfecto Yap, Presidente sang Association of Taxi Operators in Panay, iya ginpahayag nga nag-file na sila sang panumbungon sang nagligad Hunyo batok sa Grab, apang, wala na-schedule ang hearing bangud man sa madamo nga aktibidad.
Suno kay Yap, magasto sa ila nga bahin ang pagpatigayon sang mga rekisitos sa national level agud nga mahatagan solusyon ang ila katapo nga taxi.
Gintumod man ni Yap nga ini man ang rason kon ngaa ginbalik na lang nila ang reklamo sa regional level.
Ginsaysay man sang natungdan nga nagaunod ang petisyon sang mando nga wala sang kahigayonan ang Grab Car nga makalibot sa syudad.
Ginpahayag man sini nga dapat may ‘specific’ lang nga lugar ang Grab Car agud nga himuon ruta.
Gin-athag man ni Yap nga indi dapat magpasakay sang pasahero ang mga Grab driver sa mga dalan nga masami may nagapamaypay nga pasahero.
