Nag-abot na sa Western Visayas ang second batch sang COVID-19 vaccines halin sa Sinovac kag first batch sa AstraZeneca.
Ini ang ginabug-usan sang 16,880 doses sa Sinovac vaccine kag 10,000 doses sa AstraZeneca.
Matandaan nga Marso 5 sang nag-abot sa Iloilo ang una nga batch sang 17,000 doses sang Sinovac vaccine.
Sa interview sang Bombo Radyo kay Dr. Maria Sophia Pulmones, pinuno sang local health support division sang Department of Health (DOH) Region VI, iya ginpahayag nga ang ikaduha nga batch sang Sinovac vaccine ang ipanagtag sa tanan nga ospital sa Western Visayas ilabi na sa Level 1-3 hospitals.
Para naman sa mga health worker kag personnel nga nakabaton na sang una nga dose sang Sinovac vaccine, ang ikaduha nga nag-abot sang damlag lang nga ginabug-usan sang 16,880 doses ang gamiton para sa ikaduha nga dose pagkatapos sa interval nga 28 ka adlaw.
Bangud naman sa manubo nga suplay sang AstraZeneca COVID-19 Vaccines, unahon nga ipanagtag ang 10,000 doses sa 5,000 ka-tawo nga naga-edad 60-anyos pataas.
Samtang, nagdangat naman sa 1,634 ang numero sang mga health worker kag personnel nga natublukan na sang una nga batch sang Sinovac vaccine.
Suno kay Pulmones, wala pa sang report nagikan sa Central Office sang DOH kun may maabot pa nga dugang nga dose sang Sinovac Vaccine sa Western Visayas.
Ginpahayag sang natungdan nga magasapol man sila sa Regional Vaccination Operation Center Region 6 may kaangtanan sa allocation sang AstraZeneca Vaccine.
Nahibaluan nga Marso 8 sang dululungan nga nagpatigayon sang inoculation sang Sinovac Vaccines ang anom ka mga priority hospitals sa Western Visayas.
Sa Iloilo, ini ang ginalakipan sang St. Paulโs Hospital Iloilo,Western Visayas Medical Center, Iloilo Doctors’ Hospital kag West Visayas State University Medical Center.
Samtang sa Bacolod City naman, ini ang ginalakipan sang Corazon Locsin Montelibano Memorial Regional Hospital kag Dr. Pablo O. Torre Memorial Hospital (Riverside Medical Center).
