ILOILO CITY – Nangin sentro sang privilege speech ni Iloilo City Councilor Ely Estante kadungan sang regular session kaina ang tuhoy sa asud-asud nga krimen sa syudad sang Iloilo sang damlag lang.
Sa exclusive interview sang Bombo Radyo kay Estante, iya ginpahayag nga wala niya ginapangunahan ang Philippine National Police apang luyag lang niya nga hibaluon kun ano gid ang kamatuoran.
Suno kay Estante, nagatuga sang kakugmat sa publiko ang nagakatabo nga abduction nga nagaresulta sa police operation.
Ginpahayag ni Estante nga tatlo ang punto sang iya nga privilege speech kag ini amo nga dapat sundon ang standard operating procedure sa tion nga may yara sang dakpon paagi sa warrantless arrest, nagakadapat nga wala sang white wash sa imbestigasyon agud tabunan kun ano man ang kontrobersiya kag dapat nga may yara sang functional Closed Circuit Television camera sa palibot sang syudad sang Iloilo nga mahimo magamit nga ebidensya sa tion nga may krimen.
Mas makapaayo man suno sa natungdan nga mangin mabinantayon man ang mga tawo sa palibot kag dapat nga kuhaan sang laragway ukon video kun may yara sang kamala-malahan.
Gin-athag man sang Konsehal nga wala siya sang may gina-apinan kundi ang iya lamang luyag nga matabo amo nga ang mga may sala lamang amo ang dakpon paagi sa nagakaigo nga proseso.
Sa subong suno kay Estante, yara na sa komitiba ni Iloilo City Councilor Jojo Javellana ang ginaduso nga ammendment sa Closed Circuit Television camera ordinance.
Suno kay Estante, kun sang una, kinahanglan anay nga may yara sang pahanugot gikan sa korte ang pagkuha sang kopya sang CCTV footage para sa imbestigasyon sa tion sang krimen apang sa ginaduso nga ammendment, kinahanglan gilayon nga ihatag sa otoridad ang CCTV footage para sa mas madasig nga imbestigasyon.
Sakop man sang ammendment amo nga dapat ang tagsa ka commercial establishment kag ang tagsa ka barangay sa syudad sang Iloilo ang may yara sang functional nga CCTV camera kag indi lamang para sa display ukon compliance sa nasambit nga ordinansa.
