Nagpatigayon sang ikaduha nga hugnat sang consultative meeting ang Syudad sang Iloilo tuhoy sa re-development sang Iloilo Central Market.
Sa interview sang Bombo Radyo kay Mayor Jose Espinosa III, iya ginpahayag nga tinutuyo sang nasambit nga pagsinapol amo nga mapahangop sa mga vendor nga para sa kaayuhan sang kadam-an ang ginaduso nga pagkaayo sang Central Market.
Sa pagsinapol, ginkuha man ang tanan nga inputs gikan sa mga transient vendor tuhoy sa nasambit nga proyekto.
May yara sang tatlo ka kuhaan sang pondo suno kay Espinosa.
Lakip diri ang annual budget sang syudad, national government ukon mag loan.
Sa phase 1 sang proyekto suno kay Mayor Espinosa, may yara na siya sang pagakuhaan sang pondo apang nagpamalibad ang alkalde nga ihingadlan ini.
Samtang,  may yara pa sang asud-asud nga consultative meeting sa mga vendor tuhoy sa redevelopment sang Iloilo Central Market.
Sa interview sang Bombo Radyo kay Local Economic Enterprise Office (LEEO) Head Ariel Castañeda, iya ginpahayag nga ang ginpatigayon sang Nobyembre 12 nga pagsinapol ang para sa mga transient vendors, sang Noyembre 13, natalana naman ang pagsinapol tuhoy sa mga vendor sa meat, fish, dried fish kag rice and grain sections.
Natalana naman ang pagsinapol sa mga vendor sa peripheral kag second-floor sections sa Noyembre 14, sa Nobyembre 16 naman ang para sa vendors sang dry goods, grocery kag variety sections kag sa Nobyembre 17 naman para sa vendors sa fruit and vegetable section, eatery section kag flower section.
Sa pagsinapol sang Nobyembre 12 suno kay Castañeda, may yara sang video presentation nga ginpakita si City Adminsitrator Atty. Hernando Galvez kun paano patigayunon ang re-development sa nasambit nga merkado.