ILOILO CITY – May yara na sang choice ang mga asymptomatic COVID-19 positive nga makapaidalom sa strict home quarantine ukon sa facility quarantine.
Ini ang nalakip sa panibag-o nga guidelines ni Iloilo City Mayor Jerry Treñas may kaangtanan sa ginapatuman nga General Community Quarantine sa syudad sang Iloilo.
Sa interview sang Bombo Radyo kay Treñas, iya ginpahayag nga sa tion nga may magpositibo sa isa ka barangay, ang balay sang COVID-19 positive ang iga-lockdown sa sulod sang 14 ka adlaw kag magapalab-ot naman sang bulig ang Iloilo City Government.
Ang COVID-19 positive suno kay Treñas ang mahimo nga makatinir sa quarantine facility ukon sa balay lang mismo apang kinahanglan nga may yara sang separado nga kwarto kag comfort room ang asymptomatic patient agud nga indi malatnan ang mga kaupod sa balay.
Magluwas diri, ginpahayag sang alkalde nga mahimo na nga pahanugutan ang byahe sang fast craft nga may ruta nga Iloilo City-Bacolod City vice versa kag ginatun-an naman kun bala mahimo na nga makabukas ang mga balay-ilimnan sa bug-os nga syudad.
