Nangin pamaagi ang modular learning agud nga mas maghugot pa ang relasyon sang ginikanan kag mga kabataan.
Ini ang ginpamatud-an sang isa ka iloy nga wala nagduha-duha nga mangin partner sang iya anak sa pagsaot sang folk dance bilang performance task para sa subject nga Physical Education (PE).
Sa interview sang Bombo Radyo kay Ann Cachuela Manzano, residente sang Barangay Dalid, Calinog, Iloilo, iya ginpahayag nga challenging subong ang sistema sang pagtuon sang mga kabataan bangud magluwas nga tungdan ang pagka-iloy, dapat man ini nga mangin manunudlo agud magiyahan ang iya tatlo ka mga kabataan.
Suno kay Manzano, subong nga may pandemya, katungdanan niya bilang iloy nga ma-manage sang maayo ang iya nga oras bilang nanay, empleyado kag manunudlo.
Kada hapon, pagpauli halin sa trabaho pahayag niya, ginareview niya gilayon ang mga modules sang iya kabataan.
Kun sa eskwelahan may yara sang time schedule, sa ila nga balay suno kay Manzano, may yara man sang oras para sa pagtuon kag break time agud mahatagan man sang ligwa ang mga kabataan sa ila nga paghampang.
Sang Hunyo 25 amo ang adlaw sang pasahay kuntani sang performance task sang iya anak sa P.E apang bangud nga indi pwede nga lalaki man ang mangin partner sang iya anak, siya na lang bilang iloy ang nag-upod sa pagsaot.
Suno sa iloy, mangin ang iya nga bana ang todo suporta man sa ila samtang ginahimo ang task.
Panugyan ni Manzano sa iya kaangay nga mga iloy, giyahan sang maayo ang mga kabataan sa ila nga pagtuon ilabi na subong nga modular kag online learning ang ginapatuman bangud sa COVID-19 pandemic.
