Ginhingadlan sang isa sa mga akusado ang negosyante nga si Charlie “Atong” Ang nga amo ang mastermind sa pagkadula sang mga manugbulang sang 2021.
Sandig ini sa panaysayon ni Julie “Dondon” Patidongan nga nag-alegar man nga may ihibalo man ang beterana nga aktres nga si Gretchen Barretto sa mga natabo.
Si Patidongan amo anay ang nagapanguna sa seguridad sang cock farms ni Ang.
Sa iya statement, ang ginhingadlan pa sini nga utok sa krimen luwas kay Atong Ang amo sanday Eric Dela Rosa kag Engineer Celso Salazar.
Suno kay Patidongan, si Dela Rosa ang nagpa-monitor sa mga manugbulang nga may “nagapangdaya”; sunod nga ini ang gin-report kay Atong; kag gin-diskusyunan kaupod kay Salazar.
Ginpahayag ni Patidongan nga gintawagan siya agud i-hold ang mga manugbulang. Dugang sini, si Atong gid ang ginakabig niya nga “pinaka-mastermind” bangud ini ang nagsugo nga himuson na ang mga manugbulang.
“Mr. Charlie Atong Ang and then Eric Dela Rosa, Engineer Celso Salazar, sila ang mastermind sa mga nawawalang sabungero,” pahayag sang whistleblower. “Si Mr. Atong Ang…siya ang pinaka-mastermind at siya naguutos na talagang iligpit ng mga ‘yan.”
Pahayag pa niya, 100% nga may ihibalo si Gretchen sa tanan nga ini ilabi na bangud masami ini nga kaupod ni Atong sang una. Nagpanawagan man ang akusado sa beterana nga aktres nga magbulig na lang para sa kaso.
Isa si Patidongan sa anum ka mga akusado sa pag-abduct sa mga manugbulang nga na-report nga missing halin sang 2021-2022.
Ginsiling sini nga sa sulod sang malawig nga tinuig, subong lang siya nagpangisog sa paghambal sang matuod bangud nagapati siya nga indi sarang mabayaran ukon mapahipos ni Atong si Philippine National Police chief General Nicolas Torre III.
Sa pihak nga bahin, nagpahayag naman ang kampo ni Atong nga kasuhan nila si Patidongan sa Office of the Prosecutor sa Mandaluyong. Sabat naman ni Patidongan, wala siya nahadlok. Nagpanawagan man ini kay President Ferdinand Marcos nga manduan ang mga awtorida nga resolbahon gilayon ang kaso para sa mga pamilya sang mga biktima.#
