Nagsumiter ang kampo sang negosyante nga si Charlie ”Atong” Ang sang mosyon para suspendihon ang proceedings sa mga kaso sini nga ginapangatubang kaangot sa missing sabungeros.
Suno kay Department of Justice (DOJ) spokesperson Polo Martinez, ginsumite ini sang abogado ni Ang sa San Pablo Regional Trial Court (RTC).
Nahanungod ini sa kaso nga kidnapping with homicide kag kidnapping with serious illegal detention.
Bangud diri, ginpaiway anay sang korte ang pagpaguwa sang warrant of arrest kay Ang matapos ang pagsumite sini sang mosyon.
Suno naman kay Prosecutor General Richard Fadullon, ginpangabay sang korte ang mga respondent nga magsumite sang mga dokumento nahanungod sa kaso bilang counter-affidavits.
Ginsiguro naman sini nga magatuman kag maga-comply sila sa ginapangabay sang korte para mahibaluan kun san-o magapagwa sang warrant of arrest.
Dugang pa ni Fadullon nga kun ano man nga tikang sang korte amo man ang buhaton sang DOJ.
Ginkumpirmar ni Martinez nga nag-umpisa na ang hearing sa kaso ni Ang sa mga korte sang Lipa kag Sta. Cruz.
Nahibaluan nga gin-anunsyo ni Interior Secretary Jonvic Remulla nga magadugang sila sang P10-milyon nga reward para sa makatudlo kay Ang nga una na niya gintawag nga number 1 most wanted person sa Pilipinas.
