Nagapati ang Association of Taxi Operators of Panay nga wala halos sang dako nga mabulig ang pagsuspende sang excise tax sa nagapadayun nga pagtaas sang presyo sang gatong.
Sa interview sang Bombo Radyo kay Perfecto Yap, Presidente sang nasambit nga asosasyon, iya ginpahayag nga makabulig man ang nasambit nga lihok sang gobyerno sa transport sectors, apang P6 lang ang mabuhin sa presyo sang gatong nga magapabilin sa gihapon sa mga produktong petrolyo sa balor nga masobra P100.
Suno pa sa iya, wala gid nagasanto ang tikang nga ini agud nga mahagan-hagan ang krisis sa Pilipinas.
Madumduman nga ginpirmahan na ni President Ferdinand Marcos Jr., ang layi nga nagapahanugot sa iya nga suspendihon ukon buhinan ang excise tax sa produktong petrolyo nga mangin epektibo matapos ang 15 ka adlaw matapos niya ini napirmahan.
