JARO, ILOILO CITY – Ginpa-Bombo sang mga tricycle drivers ang atrasado nga pagkaayo sang drainage system sa entrance sang Bankers Village sa Tabuc Suba, Jaro, Iloilo City.
Sa interview sang Bombo Radyo kay Ronie Gonzales, iya ginpahayag nga sobra na duha ka semana humalin sang gin-umpisahan ang proyekto.
Suno kay Gonzales, nagatuga ini sang dako nga huol indi lang sa ila nga mga tricycle drivers kundi mangin sa mga residente sang nasambit nga subdivision.
Suno sa natungdan, sa baylo nga sa atubang sang subdivision, magpanaog ang mga pasahero nga nagasakay sa pampubliko nga salakyan, sa subong, nagapanaog pa ang mga ini sa atubang sang opisina sang Land Transportation Office Region 6.
Sa ila naman nga bahin, nagakabuhinan man ang ila nga kita bangud kun sang una P400 ang ila mabenta kada adlaw, apang sa subong yara na lang sa P250 ang ila kita.
Nagpanawagan man ang natungdan sa Department of Public Works and Highways (DPWH) nga padasigon ang proyekto.
