ILOILO CITY – Ginpa-Bombo sang pila ka mga pumuluyo sang Barangay Montinola, Jaro, Iloilo City ang atrasado nga pagpasemento sang dalan sa nasambit nga barangay.
Base sa project billboard, Abril 17, 2023 nagsugod ang proyekto kag matapos kuntani sa Mayo 15 sang amo man nga tuig.
Ang implementing agency amo ang Iloilo City District Engineering Office sa idalom sang Department of Public Works and Highways.
Nagdangat sa P2.4 million ang budget nga ginkontrata sang Abelarde Builders and Supply.
Sa interview sang Bombo Radyo kay Ariel Gloria, anay Environmental Management Bureau Region VI director kag pumuluyo sang barangay, iya ginpahayag nga bangud sa ongoing construction, indi maka-agi ang ila salakyan, indi maka-agi ang truck nga nagahakot sang basura kag wala sang nagaka-igo nga information dissemination.
Suno kay Gloria, wala man sang may ginplastar nga alternatibo nga alagyan para sa mga salakyan.
Ginkatingala man nila bangud nga sa baylo nga Abril masugod ang proyekto base sa project billboard, Agosto na ini nagsugod.
Ginkwestiyon man nila ang manu-mano nga pagmaso sang trabahador sa semento kag paggamit lamang sang pick-up truck sa paghakot sang mga balas nga nagapadugay pagid sa proyekto.
Pahayag sang natungdan, dako ang hu-ol sang atrasado nga proyekto sa madamo nga pumuluyo nga nagalakat sang halos 250 meters agud nga makagwa sa lugar.
