ILOILO CITY–Ginklaro ni Atty. Dan Cartagena kun ano ang iya luyag matabo sa pagfile sang petition for mandamus, injunction kag temporary restraining order (TRO) sa Korte suprema.
Si Cartagena ang nakakuha sang ika 13 nga pwesto sang nagligad nga midterm elections apang tubtub lang sa 12 ang mahimo nga makasulod sa pagka konsehal sa Iloilo City Council.
Ini ang may kaangtanan sa plano, nga ang partido sang nagtaliwan nga si Kagawad Armand Parcon nga National Unity Party (NUP) amo ang magapili sa kun sin-o ang mabulos sa nabakante nga posisyon sini sa Sangguniang Panlungsod.
Sa interview sang Bombo Radyo kay Cartagena,iya ginpahayag nga ang petition for mandamus amo ang paghingyo sang direktiba sa Korte nga magre-conviene ang mga Board of Elections Inspectors sa Iloilo City agud igaproklamar siya bilang ika 12 nga konsehal.
Ang injunction naman kag TRO suno sa iya ang may tinutuyo nga hatagan sang Korte sang direktiba ang Department of Interior and Local Government (DILG) nga indi magproseso kag magpadayun sa plano nga mag-appoint sang mabulos sa posisyon nga nabakante ni Parcon.
Ginpanindugan man niya nga indi mahimo magamit ang section 45 sang Local Government Code bangud sang tion nga nabakante ang posisyon ni Parcon wala pa ini nakasumpa kag nakasugod sang iya pagpangalagad bilang konsehal sang masunod nga Sangguniang Panlunsod.
Kun may yara man sang iga-appoint suno sa iya ini ang magaserbe sang unexpired term ni Parcon nga tubtob nalang sa Hunyo 30 apang indi ini mahimo magserbe sa full term sang napatay nga konsehal.
Gin-athag man ni Cartagena nga ang pagbulos sadto ni Councilor Candice Tupas sa iya bana nga si anay Councilor Lex Tupas ang nasanto sa section 45 bangud nga ang anay konsehal ang incumbent, nakasumpa kag naka-umpisa na sang iya termino bilang katapo sang Sangguniang Panlungsod antes paman ini nangin executive director sang National Youth Commission (NYC) .
Wala man siya nagahingyo suno kay Cartagena nga magapungko siya bilang isa ka appointee ukon pinaagi sa rule of succession apang luyag niya nga ang iya pagpungko ang pinaagi sa pagre-conviene sang BEI sa diin igaproklamar siya bilang ika 12 nga nagdaog sa pagkakonsehal sa syudad sang Iloilo.
Nagalaum naman si Cartagena nga sa madali nga panahon mahatagan ini sang kasulbaran.
