ILOILO CITY – Ang Iloilo City Council na ang ma-adjust agud nga makatambong na gid ang Land Transportation Office (LTO) Region VI sa sunod nga consultative meeting angot sa private motor vehicle inspection center ukon PMVIC system.
Sa interview sang Bombo Radyo kay Iloilo City Councilor Atty. Rommel Duron, iya ginpahayag nga sa palaabuton nga Lunes, personal siya nga magapadulong sa opisina sang LTO Region VI agud mang-imbitar liwat.
Suno kay Duron, bilang chair sang Committee on Transportation, wala man siya kuntani nagkulang sa pagpahibalo sa mga taga-LTO Region VI nga kinahanglan ang ila presensya sa pagsinapol kaupod ang mga tiglawas sang transport group.
Liwat man nga nagpanindugan si Duron nga sa mismo adlaw sang meeting, nag-text siya kag nagtawag sa designated spokesperson nga si Atty. Allan Sacramento apang wala man sini ginsabat ang iya nga cellphone.
Ginpahayag ni Duron nga problema na sa tunga sang mga personnel sang LTO kun sin-o ang ila nga patambungon bangud ang importante man lang suno sa iya amo nga mapaathagan sila sang maayo sa kontrobersiya nga dala sang PMVIC.
Dugang pa ni Duron, paagi man ini sang konseho agud mabuligan ang LTO nga mas mapasangkad ang information dissemination angot sa bag-o nga car registration system.
