Ginbalewala lang ni Atty. Harry Roque ang isa ka online nga petisyon nga nagapamangkot sang iya aplikasyon para sa asylum sa The Netherlands.
Sang damlag lang nagpost sang online petition ang Filipino Dutch nga si Joel Vega kasunod sang iya sulat sa Immigration and Naturalization Service (IND) sang Netherlands nga nagahingyo nga indi pagbatunon ang hingyo ni Atty. Roque.
Ginrason ni Roque nga ang isyu sa asylum application amo kun bala may yara sang political persecution kag indi ini subject sa anuman nga pagboto.
Ang anay presidential legal counsel nagpadayon man nga iya pamatud-an sa Netherlands nga ang imbitasyon sa iya sang Quad Committee sang Kamara sang mga Representantes ang isa ka paghingabot sa politika.
Una na nga ginpahayag sang abogado nga nag-apply siya sang asylum sa pungsod, matapos ang iya pagbutwa liwat sang nag-atubang ang anay presidente nga si Rodrigo Duterte sa Pre-Trial Chamber sang International Criminal Court (ICC).
Apang ginrason ni Vega nga madugay na nga yara sa sulod sang Duterte political circle si Roque nga sa gihapon may mataas nga impluwensya sa pulitika sang Pilipinas.
Dugang pa ni Vega nga indi biktima ang beterano nga abogado diri sa Pilipinas, kag wala ini sang bastante nga basehan para sa iya aplikasyon. Suno sa iya, ginagamit lamang sang beterano nga abogado ang Dutch system agud makapalagyo sa responsibilidad sa sini nga pungsod.
Sa karon, ang petisyon nakatipon na sang pila ka libo ka mga pirma.
