Nagapanindugan si anay Presidential Spokesperson Atty. Harry Roque nga indi siya maghalin sa The Hague, Netherlands, kun indi siya personal nga pagpapulion ni anay Presidente Rodrigo Duterte.
Ginpahayag ni Roque nga magapadayon siya sa pagpabilin sa Netherlands agud suportahan si Duterte sa ginaatubang sini nga kaso sa International Criminal Court (ICC).
Ginhimo ni Roque ang amo nga pahayag sa pihak sang nauna nga statement sang legal counsel ni Duterte nga si Nicholas Kaufman nga indi luyag sang anay presidente nga mangin kabahin si Roque sa iya kaso.
Ginpa-athag ni Kaufman nga mas maayo pa nga atubangon ni Roque ang iya kaugalingon nga mga kaso sa Pilipinas.
Apang, magapabilin si Roque sa pagsuporta kay Duterte.
Ginklaro man ni Roque nga wala siya sang personal nga away kay Kaufman kag wala man siya sang labot sa iya.
Suno sa iya, lima ka bulan na niya ginauyatan ang kaso ni Duterte kag wala pa siya nagpagguwa sang bisan ano nga reklamo sang pagdumala sini sa kaso.
